التهرب من المذاكرة

التهرب من المذاكرة في نهاية الثانوية العامة،وكيف نتخلص منه.

 

التهرب من المذاكرة في آخر الثانوية، وكيفية معالجته:

أبطال ثانوية عامة الصامدين لحد هذه اللحظة، ثانوية حلوة تتحدث إليكم، جايين نقولكم: أن الخوف لا حل له إلا مواجهته.
عدد مش قليل من الطلاب بدأ التهرب من المذاكرة خلال الفترة الأخيرة من الثانوية بالنوم، والسوشيال ميديا؛ لأن الظاهر إن خلاص الدنيا خرجت عن السيطرة. والنوم بيرحم الإنسان ولو بشكل مؤقت من التفكير المرهق، والمسئولية اللي بقت كبيرة وتقيلة.

الموضوع حلّه إنك تواجه؛ وتُقَف للمذاكرة راجل لراجل، وتكون قدام نفسك كبير ومتحكم في حياتك، الفشل مش إنك تقع كتير وتتغِلب، الفشل اللي بجد إنك تبطل تحاول وتعافر، وتختار تتغلب.
بدأتم ثانوية من شهر 7 وها هي الرحلة على وشك الانتهاء، في نهاية الأمر ستحصل على مافيه الخير لك فكن مطمئنًا، لقد فعلناها من قبلك وها نحن كلٌ مِنَّا فى مكانه المناسب الذى اختاره الله.

حاولوا إنهاء الرحلة بأفضل صورة ممكنة علشان شكلكم قدام نفسكم، وعلشان تبقوا عارفين إنكم عملتو اللي عليكم.

في كل رسايلنا ليكم هتلقونا بنقول لكم: اللي فات فات ونحن أبناء اليوم ،اعملوا اللي تقدروا عليه دلوقتي، وربنا هيكرمكم، جددوا النية للعمل والمذاكرة وابدأوا مباشرة. 

نصيحة تانية نحب نقدمهالكم:

اعملوا تتبع ليومكم. لازم قبل ما تناموا تكونوا عارفين عندكم إيه بكرة؛ بحيث تصحوا على العمل على طول.
ورقة يومية تُكتَب فيها المهام وتعَلِّموا على كل جزء تخلصوه. دا هيحسسكم بالإنجاز وبالتقدم ناحية الهدف، وإنكم مش فاشلين زي مابتقولوا لنفسكم وقت الإحباط. وياريت تكونوا واقعيين مع نفسكم وقت تحديد المهام. 

 الأهداف علشان تتحدد صح، ضروري تكون أهداف ذكية “SMART goals”

هنوضحلكم ازاى تحددوا أهداف ذكية ليومكم:

أولًا: بلاش موضوع هذاكر من ٨ص ل ١٠ص خمس أبواب فيزياء.
ومن ١٠ص ل ١٢م نص منهج العربي.
ومن ١٢م ل ٢م أحياء؛ يؤسفنا قول أن هذا لن يحدث. عزيزي الطالب كفاية، عملناها كتير قبلك ومانجحش الموضوع .

طيب الهدف الذكي (SMART) ده شكله إيه؟

هدف محدد: Specific

ماينفعش تقول أنا عاوز أذاكر و دا هدفي. 
حدد مادة أو اتنين، وحدد عاوز تذاكر فيهم الفصل رقم كام، والفصل دا هياخد كام يوم. لأنك محتاج تقسم الفصل لدروس بعد شوية؛ كدا حددنا الهدف.

هدف قابل للقياس: Measurable

يعني لما تخلص الدرس الأول من الفصل، باعتبار أن الفصل أربع دروس؛ الدرس الأول هيمثل 25% من الهدف، والأربع دروس يمثلوا ال 100% بكدا إنت قست تقدمك.


هدف قابل للتحقيق: Achievable

يعني حاجه منطقية يقدر يعملها الإنسان العادى. ما ينفعش تقول هخلص ربع منهج العربى فى يوم دا مستحيل، هتخلص نص وحدة مثلًا دا مقبول وتقدر تعمله.

هدف له صلة بالموضوع: Relevant
إنت فى ثانوية عامة، الواقع بيقول إنك تذاكر المنهج بتاعك، مش تروح تتعلم أسباني (حتى لو كان الأسباني لغتك التانية ،إنت مطالب فقط بمنهجك. والتعمق في دراسة اللغة هيأثر بالسلب على باقي مذاكرتك. ده مش وقته) ولا تروح تدرس مواد طبية من اليوتيوب. ركز فى مقررك دلوقتي عزيزي الطالب.


هدف محدد بوقت: Time bound
يعني ما تقولش هذاكر تاريخ وتاخد شهر بتذاكر، وإنت مش عارف وصلت فين ولا إمتى هتخلص. لكن تقول الأسبوع دا هذاكر باب واحد، من يوم السبت ليوم الجمعه بمعدل 3 ساعات يوميًا. إنت كدا محدد كويس هتبدأ يوم إيه وهتخلص كمية إيه. 
وطبعًا كل النسب والمواعيد والكميات دي، مجرد أمثلة عشان نوضحلكم الفكرة.
هنحب تقولولنا النصائح دي فرقت معاكم إزاي بعد تطبيقها. تقدرو تكلمونا في أي وقت على رسائل صفحتنا من هنا ثانوية حلوة.
فريق ثانوية حلوة كله موجود معاكم طوال الوقت؛ لأن هدفنا نساعدكم توصلوا.
دمتم أقوياء.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: تحذير هذا المحتوى تمت كتابته بواسطة فريق ثانوية حلوة، يمكنك مشاركة المقالة مع الجميع، لكن بدون نسخها.