أول ما بتطلع النتيجة بتلاقي الناس بتقولك “المرحلة الأولى بتاخد من كام؟” و”الناس اللي معاها دور تاني هتعمل تنسيقها في المرحلة التالتة” وكلام كتير مش مفهوم كده، هنا هنعرفك كل حاجة عن مراحل التنسيق الأولى والتانية والتالتة.
يعني إيه مرحلة أولى وتانية وتالتة أصلًا؟!
مراحل التنسيق هي تقسيم للدفعة عشان ميبقاش كله بيعمل التنسيق مرة واحدة، ف مكتب التنسيق بيحدد عدد معين من الطلبة ويخليهم يعملوا تنسيقهم (المرحلة الأولى).
بعدين ياخد مجموعة تانية يعملوا تنسيقهم (المرحلة الثانية)، بعدها بيكون لسه فاضل ناس، وبيكون في ناس كانت شايلة مواد وامتحنتها في الدور التاني ونجحوا، ف بيجمعوا كل دول سوا ويخلوهم يعملوا تنسيقهم (المرحلة الثالثة).
على أي أساس بيحددوا مين يكون في أنهي مرحلة؟
على أساس الأعداد؛ بيكونوا عايزين مثلًا 100 ألف طالب في أول مرحلة ف بيرتبوا الطلبة بالمجاميع وياخدوا أعلى 100 ألف واحد، وده بيحصل لكل شعبة لوحدها مش على بعض كلهم (طبعًا رقم 100 ألف ده افتراضي من عندنا بنشرح بيه بس).
ازاي بيحطوا الحد الأدنى لكل مرحلة في كل شعبة؟
بعد ما بيحددوا العدد اللي في المرحلة لكل شعبة، بيشوفوا أقل طالب في العدد ده جايب كام ويكون ده الحد الأدنى للمرحلة.
مثال: حددوا إن شعبة علمي رياضة ناخد منها 50 ألف طالب، ولقوا إن الطالب رقم 50 ألف (أقل مجموع في المرحلة) جايب 94%، ساعتها يتم الإعلان إن المرحلة الأولى هتاخد من 94% لشعبة علمي رياضة، وهكذا لباقي الشُعب ولباقي المراحل.
هل كل مرحلة بتفرق عن التانية من حيث الكليات المتاحة؟
النظام هو هو في كل المراحل، الفرق إن في كليات بتتملي. يعني طلبة المرحلة الأولى بيكون متاح ليهم كل الكليات، بيختاروا منها وبعد ما التنسيق بتاعهم يخلص وكل واحد يدخل كليته، في كليات بتتملي بيهم؛ مثلًا تلاقي كلية كانت عايزة 5 آلاف طالب وفي 5 آلاف اختاروها خلاص ودخلوها، لو ظهرت في المرحلة التانية مش هيكون ليها لازمة لأنها كده كده مفيهاش مكان خلاص، ف بتتشال من المرحلة التانية ومبتظهرش من الأساس، لكن لو لسه فيها ولو مكان واحد ف بتنزل المرحلة اللي بعدها عادي لحد ما حد يختارها ويملى المكان الفاضي ده.
امتى بنقدر نعرف إن كلية معينة خدت من مجموع كذا؟
دي مبتتعرفش إلا بعد ما الكلية بتتملي؛ يعني أي خبر على موقع تلاقيه بيقولك تنبؤات بمجموع كلية كذا ولسه مرحلة التنسيق مخلصتش ف ده كلام فاضي ومجرد توقعات، إنما إحنا بنعرف الكلية خدت من كام بعد ما الكلية تملى كل أماكنها ف نشوف أقل طالب دخلها كان جايب كام، ومجموعه ده هو بيبقى الحد الأدنى بتاع الكلية.
يعني مفيش حد يقدر يعرف الحد الأدنى بتاع أي كلية قبل ما التنسيق بتاع الكلية دي يخلص وتتملي على آخرها.
التنسيق بيحتاج كمبيوتر ونت، لو معنديش ده أعمل إيه؟
مكتب التنسيق عامل خدمة مجانية إنك تروح لحاجة اسمها “معامل الحاسبات” موجودة في الجامعات، بتكون مفتوحالك خلال مدة كل مرحلة تنسيق (اللي هي تقريبًا 5 أيام لكل مرحلة)، تقدر تروح هناك وتعمل تنسيقك. وكمان بعض المدارس اللي فيها نت ومعمل كمبيوتر بتقدر تعمل التنسيق من هناك
أماكن مكاتب التنسيق الالكتروني بالجامعات تقدر تشوفها من موقع التنسيق من هنا.
طب أنا مُعفى من اللغة الثانية، مجموعي هيتحسب ازاي؟
بتحسب حاجة اسمها مجموع اعتباري وده اللي بتتعامل بيه، وده بتحسبه كده: المجموع الكلي * 410⁄370
لو أنا بلعب رياضة معينة وليا درجات حافز رياضي، مجموعي هيتحسب ازاي؟
هتزودها على مجموعك (المجموع الأصلي + درجة الحافز الرياضي) وتتعامل بالمجموع الجديد ده في كل حاجة بعد كده.
هقدم منين للتنسيق؟
من موقع التنسيق .. دوس هنا عشان تدخل عليه.
عندي سؤال تاني مش مكتوب هنا
اكتبلنا كومنت أو ابعتلنا على صفحة الفيسبوك وقولنا سؤالك وإحنا هنرد عليك وهنزوده هنا كمان عشان باقي زمايلك.
السلام عليكم.. ابنتى معفية من اللغة الثانية…لما احاول ادخل بياناتها بتجليلى رسالة اما رقم الجلوس خطا او الرقم السرى خطا او الرقم التعريفى خطا و انا متاكد تماما انى ادخلت المعلومات صحيحة…اتصرف ازاى لو سمحتم؟
ع اي اساس بيحتاجو عدد معين ف مرحله اولي
يعني لو حددو مرحله اولي ٢٣٠٠٠ طالب علمي علوم ده معناه انو متاح للكل انهم يدخلو طب واسنان وصيدلية وعلاج باختلاف طبعا الدرجات ولا ممكن يبقا حد ادني كليه طب بيطري
يعني بيحددو الاعداد اللي محتاجنها مرحله اولي علمي علوم ع اي اساس
الموضوع بيخضع للعرض والطلب
يعني دلوقتي خلينا نبسط الأرقام ونقول مثال:
لو 1000 طالب في المرحلة الأولى علمي علوم، وكلية طب القاهرة مثلًا عايزه 100 طالب، وكلية طب عين شمس عايزه 50 طالب
ساعتها هنجيب كل اللي طالبين يدخلوا طب القاهرة ونرتبهم بالمجموع من الأعلى للأقل، وناخد أول 100، بقية الناس اللي كاتبين طب القاهرة بس بعد أول مية دول هينزلوا للرغبة الثانية بتاعتهم اللي هي مثلًا مثلًا طب عين شمس
نجيب أعلى 50 واحد طالب طب عين شمس سواء رغبة أولى أو رغبة ثانية عشان مجاتلوش الأولى، وناخد أعلى 50 من دول كلهم وهكذا
طيب بيحددوا المرحلة الأولى على أساس إيه؟
على أساس المجاميع بتاعت الطلبة والأعداد المتاحة في كل الكليات، بحيث نتوقع كام حد هيقدر يلاقي رغبته في المرحلة دي، ولو حد استنفذ كل رغباته ومجوش كلهم وده ساعات بيحصل، بينزل للمرحلة التانية بقى ولكن ده نادر جدًا جدًا