بعد النتيجة، ناس كتير بتتصدم من الدرجات وبتبقى متأكدة إن دي مش نتيجتها الحقيقية، وبيكون الحل اللي قدامهم هو التظلم. هنا هنعرفك كل حاجة عن التظلم وخطواته والأسئلة الشائعة عنه.
هل التظلم بيعيد تجميع الدرجات بس؟
لأ، ده مفهوم خاطئ لكن الحقيقة هي إن التظلم بيعمل 3 حاجات:
- لو في جزء مش متصحح هيتصحح.
- لو في خطأ في تجميع الدرجات هيصلحوه.
- لو سؤال اختيار من متعدد (choose) إنت مجاوبه صح واتحسبلك غلط هيتصلح.
الأسئلة المقالية فقط هي اللي مش بيُعاد تصحيحها.
إيه الورق المطلوب للتظلم؟
مطلوب منك بس صورة البطاقة وإيصال الدفع بتاع البنك الأهلي المصري، وطلب التظلم اللي هتاخده من المديرية.
إيه خطوات التظلم؟
- أولًا: هتروح أقرب فرع للبنك الأهلي المصري أو البريد وهتدفع 100 جنية عن كل مادة عايز تعملها تظلم .. هتدفع لحساب صندوق دعم وتمويل المشروعات التعليمية وهتاخد نسخة من إيصال السداد.
- ثانيًا: هتروح لمقر قبول الطلبات (في الصورة اللي تحت) الخاصة بمحافظتك أو تروح المديرية التعليمية، وتسلم الإيصال ده عشان يحددولك ميعاد للكشف عن ورقتك، ولما تيجي رايح المعاد ده متاخدش مدرس المادة لأن ممنوع.
- ثالثًا: لما تروح ميعادك هيدولك صورة من ورقة إجابتك لكن من غير اسمك وبيبقى عليها كود سري (عشان لما مستشار المادة يراجعها ميعرفش إنت مين) وهتبدأ تكتب ملاحظاتك في ورقة خارجية .. يعني تكتب السؤال رقم كذا فيه مشكلة كذا وكل حاجة شايف إنك مظلوم فيها .. وياريت تاخد معاك نموذج إجابة لأن مش هيدولك نموذج إجابة هناك ف اعمل حسابك من قبلها.
- رابعًا: هتسلم الورقة الخارجية وصورة ورقة إجابتك عشان الكنترول يراجعها تاني .. ولو طلع فعلًا ليك درجات هتاخد الدرجات + الفلوس اللي دفعتها في التظلم، يعني لو عملت تظلم لمادتين ومادة منهم رجعلك فيها درجات هتاخد ال100 جنية بتاعت المادة دي.
- خامسًا: بيبلغوا مكتب التنسيق بالنتيجة الجديدة بتاعتك عشان تعرف تقدم أو تحول للكلية اللي عايزها بمجموعك الجديد.
هل التظلم بيرجع درجات ولا مجرد سبوبة عشان ياخدوا فلوس؟
بيرجع درجات، في ناس كتير جدًا رجعلها درجات بالتظلم، لكن مش معناه إنه مضمون 100% بردو، لأن ساعات بتبقى فاكر إنك ليك درجات ويطلع ملكش حاجة (بيحصل بجد)، بس لو واثق إنك ليك درجات يبقى توكل على الله واعمل التظلم.
لو عملت تظلم وشوفت ورقتي إن ليا درجات بس مرجعوليش حاجة أعمل إيه؟
في الحالة دي لو نَفَسك طويل شوية ارفع عليهم قضية، ولو كسبتها بترجعلك درجاتك (ولو محامي شاطر ممكن يجيبلك تعويض بس مش حاجة مضمونة يعني) .. مع العلم إن ممكن الكلام ده على ما يخلص تكون الدراسة بدأت ف ساعتها لو خدت درجات كتير تدخلك كلية تانية هتحولها السنة اللي بعدها بقى (والحالة دي مشوفنهاش حصلت كتير يعني لأن في الغالب محدش بيبقى نفسه طويل).
هل ممكن أنقص درجات بعد التظلم؟
لأ، إنت يا بتزيد يا مبيحصلش حاجة لكن مش بتنقص درجات.
عندي سؤال تاني مش مكتوب هنا
اكتبلنا كومنت أو ابعتلنا من هنا وقولنا سؤالك وإحنا هنرد عليك وهنزوده هنا كمان عشان باقي زمايلك.