ما تريد معرفته حول قسم المعلوماتية الحيوية (Bio Informatics)

قسم المعلوماتية الحيوية (Bio Informatics) بكلية الحاسبات والمعلومات

ده قسم خاص لطلاب علمي علوم اللي حابين يدخلوا مجال الـcomputer science مع الـbiology

تقدروا تدرسوا ده في قسم bioinformatics من كلية الحاسبات والمعلومات، وفي السطور الجاية هنجاوب على الأسئلة اللي بيسألها أغلب الطلاب عن القسم. 

نظام الدراسة في القسم وطبيعة المواد

  • الدراسة بنظام الساعات المعتمدة والمصروفات في المتوسط بتقرب من 30000 في السنة.
  • الدراسة بالإنجليزية وفي كتير طلاب دخلوا الكلية بعد الثانوية العربي ومستواهم كان عادي في اللغة وقدروا يتميزوا عادي، كمان الدكاترة بيشرحوا أغلب الوقت بالعربي والمصطلحات المهمة هتتعودوا عليها بعد شوية مش هتكون مشكلة .
  • الرياضيات جزء أساسي من مواد الدراسة لأنها في النهاية كلية حاسبات ومعلومات وخريجينها مهندسين برمجيات؛ لكنها مش صعبة وهتقدر تدرسها وتراجعها بدون أي مشكلة، مش محتاج تكون بتعشق الرياضيات بس على الأقل مش بتكرهها يعني، كمان هتدرس فيزياء واحتمالات وإحصاء مواد مش صعبة بردوه تتعود عليها مع التدريب والبحث وهكذا؛ وعمومًا مهم جدًا للكلية إنك تتعلم تطور نفسك وتجتهد بعيدًا عن الكلية علشان تقدر تتميز وتتفوق أكتر. 
  • الكلية في الأساس هدفها تخرج software engineer يقدر يساعد المجال الطبي بالتالي الدراسة بشكل أساسي بتكون لمواد حاسبات مع جزء بسيط bio.

محتاج مهارات معينة قبل دخولي القسم؟

  • المهارات الأساسية للتعامل مع الكمبيوتر ولغة إنجليزية بسيطة لتخطي اختبار القدرات.
  • مهم تتعلم كيفية البحث والوصول للمعلومات وإجابات أسئلتك وتكون مستعد لرحلة من التعلم الذاتي بجانب الكلية.
  • في جزء من الطلاب بيتعلموا البرمجة قبل دخول الكلية لكنهم مش النسبة الأكبر والكلية هتعلمك ده من الصفر في كل الحالات.

فرص العمل المتاحة

الفرص متاحة بعد التخرج في أماكن كتير منها مثلًا مستشفيات زي 57357 ، مراكز البحوث أو في الشركات المتخصصة لإنتاج البرمجيات زي Microsoft , IBM ؛ ممكن تشتغل في مجالات bioinformatics أو software engineering زي خريج حاسبات ومعلومات عندك حرية الاختيار.


شروط القبول وطريقة التقديم للقسم

  • القسم مخصص لطلاب علمي علوم.
  • التنسيق ليه بيكون الحد الأدنى لتنسيق كلية حاسبات في السنة دي.
  • تنسيق الكلية في 2019 كان مابين 372 و381.5 درجة.
  • الكلية ليها اختبارات قدرات هتطبق للمرة الأولى السنة دي، الاختبار بيكون عبارة عن كمبيوتر ولغة إنجليزية ، بعد ما تنجح فيه إن شاء الله تقدر تقدم في الكلية لما يبدأ التقديم.
  • الكلية مش هتكون موجودة في الرغبات لطالب علمي علوم بالتالي هترتب رغباتك عادي جدًا وبعدين تروح الكلية وتسألهم عن ميعاد التقديم _غالبًا بيكون في المرحلة الثانية من التنسيق_ و تحول للكلية بشكل ورقي.

القسم موجود في كل الجامعات؟

للأسف لأ، القسم موجود في بعض الجامعات منهم جامعة عين شمس وهي أقدمهم وموجود كمان في جامعة القاهرة والمنصورة وشبين الكوم وبنها وأسيوط.

 

لو عندكم أسئلة تانية أو حابين نوضحلكم جزء معين تقدروا تكتبولنا كومنت أو تكلمونا من هنا في أي وقت وإن شاء الله نقدر نساعدكم.

1 فكرة عن “ما تريد معرفته حول قسم المعلوماتية الحيوية (Bio Informatics)”

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: تحذير هذا المحتوى تمت كتابته بواسطة فريق ثانوية حلوة، يمكنك مشاركة المقالة مع الجميع، لكن بدون نسخها.